राष्ट्रिय फुटबल टोलीकालागि दोस्रो चरणको छनौट

माघ २९

अखिल नेपाल फुटबल संघ एन्फाले आसन्न एएफसी च्यालेन्जकप फुटबल छनौटको तयारीकालागि राष्ट्रिय टोलीको दोस्रो चरणको छनौट गरेको छ । यसअघि पाकिस्तान विरुद्धको मैत्रीपूर्ण खेलकालागि चुनिएका ३१ मध्ये सुलभ मास्के, सरोज दाहाल र गणेश खड्का च्यालेन्जकपको समुह चरणको छनौटलाई लक्षित गर्दै घोषित टोलीमा परेका छैनन् । टोलीमा सागर थापा, जुमानु राई, अनिल गुरुङ्ग, सन्दिप राई, विराज महर्जन, सन्तोष साहुखल, चेतन घिमिरे, विजय गुरुङ लगायत परेका छन् । उनीहरु मध्येबाट २१ जना राष्ट्रिय टोलीकालागि छानिने छन् ।

यसअघिका प्रतियोगितामा नियमित रुपमा नेपाली टोलीको स्ट्राइकिङ लाइनअप सम्हाल्दै आएका जुमानुलाई प्रशिक्षक ज्याक स्टेफनोस्कीले पाकिस्तान विरुद्धका दुबै मैत्रीपूर्ण खेलमा मैदान बाहिर राखेका थिए । काठमाडौंमा आगामी महिना आयोजना हुने च्यालेन्जकपको समुह डीको छनौट चरणमा नेपालले प्यालेस्टाइन, बंगलादेश र नर्दन मरियाना आइल्याण्डसंग प्रतिस्पर्धा गर्दैछ ।