बन्द साँझ ५ बजेसम्म मात्र

काठमाडौँ, फागुन ८

बन्दले थन्किएका गाडी

मोहन वैद्य नेतृत्वको नेकपा-माओवादीले आज बिहान ६ बजेदेखि साँझ ५ बजेसम्मका लागि बन्द आह्वान गरेको घोषणा गरेको भएता पनि प्रेसका दुई गाडीहरू ६ बजेभन्दा अगाडि नै बन्दकर्ताले तोडफोड गरेका छन्। 

बन्द आह्वानकर्ताले सञ्चारकर्मीलाई लिएर आएको कान्तिपुर टेलिभिजनको गाडी नयाँ बानेश्वरमा र सगरमाथा टेलिभिजनको गाडी मध्यबानेश्वरमा बिहान ५:३० बजे नै तोडफोड गरेका थिए।

महानगरीय प्रहरी प्रवक्ता हेमन्त पालका अनुसार बन्दकर्ताले बिहान ५:३० बजेको हाराहारीमा सोह्रखुट्टे नजिकै पर्यटक बोक्ने एउटा ट्याक्सी, वनस्थली ढुङ्गेधारा र जोरपाटीमा एक-एक वटा माइक्रोबस तोडफोड गरेका थिए।

नेकपा-माओवादीले बन्दको समयमा प्रेसका गाडी, दूध बोक्ने गाडी एम्बुलेन्समाथि तोडफोड नहुने भनेर हिजो साँझ प्रेस विज्ञप्ति जारी गरे तापनि बन्द आह्वानकर्ताले पार्टीको घोषणाविपरीत गएर प्रेसलगायतका गाडीमाथि तोडफोड गरेका हुन्। रासस