एमालेको अनुशासन आयोगले भन्यो-पार्टी विघटन उन्मुख

२९ वैशाख, काठमाण्डौं । एमाले अनुशासन आयोगले पार्टी विघटन प्रक्रियामा उन्मुख भइरहेको भन्दै गम्भीर चिन्ता र चासो व्यक्त गरेको छ। निरन्तरको अनुशासनहीनता र गुटबन्दीले पार्टीमा निकै समस्या आएको भन्दै आयोगले आफ्ना सुझावहरूलाई कार्यान्वयन गर्न केन्द्रीय कमिटीको ध्यानाकर्षणसमेत गराएको छ। शुक्रबार सम्पन्न केन्द्रीय कमिटीको २१औं बैठकमा आयोगको तर्फबाट अध्यक्ष अमृतकुमार बोहराले सात पृष्ठको प्रतिवेदन प्रस्तुत गर्दै पार्टी विघटन प्रक्रियातर्फ उन्मुख भइरहेको किटानी गरेका हुन्।

‘पार्टी अनेकौं दृष्टिकोणबाट निरन्तर कमजोर बनिरहेको छ, पार्टी विघटनको प्रक्रियामा उन्मुख भइरहेको छ, पार्टी संगठनहरू राम्ररी परिचालित भएका छैनन्, पार्टीमा गुटबन्दी र बहुध्रुवीकरणका प्रवृत्ति मौलाइरहेको छ,’ प्रतिवेदनमा बोहराले भनेका छन्। पार्टीको आन्तरिक जीवनका सम्बन्धमा केन्द्रीय कमिटीका विभिन्न बैठकमा गम्भीर कुराहरू उठ्ने गरेको स्मरण पनि प्रतिवेदनमा गराइएको छ। ‘पार्टीमा पलायनता, निराशा र निष्क्रियता बढिरहेको छ, स्वच्छन्दता, आत्मकेन्द्रित उपभोक्तावादी, अवसरवादी सोच एवं गलत चिन्तन तथा प्रवृत्ति, वैचारिक र सैद्धान्तिक कामप्रतिको उदासीनता, अनुशासनहीनता र क्रान्तिकारी आचरण, पद्धति र शैलीमा गम्भीर समस्याहरू उत्पन्न भइरहेका छन्,’ एमाले अनुशासन आयोगको निष्कर्ष रहेको राजधानी दैनिकमा खबर छ।

पार्टीमा तेरो र मेरोको भावनाले प्रश्रय पाइरहेको, जनतामाथि भइरहेको शोषण र उत्पीडनविरुद्ध आवाज बुलन्द गर्नुपर्नेमा तमासे र भनसुनमा सीमित हुने, अवसर र पदलाई नै सबथोक ठान्ने एवं वर्गसंघर्षबाट विमुख हुने प्रवृत्ति बढिरहेको भन्दै आयोगले गम्भीर चिन्ता पनि जनाएको छ। त्यसैगरी, नेताहरूको जीवनशैलीमा अपारदर्शी तडक–भडक बढिरहेको, वर्ग दृष्टिकोण र सोचमा परिवर्तन आएको, निर्धारित विधि, पद्धतिको आधारमा चल्नेभन्दा जालझेल र छलकपटको आधारमा चल्ने प्रवृत्तिको विकास भइरहेको आयोगको समीक्षा र मूल्यांकन रहेको प्रतिवेदनमा उल्लेख गरिएको छ।